كم اتمنى...

فى هذا السقيع .. وفى ليله من ليالى الشتاء الهادئه حد الكأابه ..

صوت الهوا مسموع .. بيخبط فى الحيطان

والحزن بين الضلوع .. والضلمه فكل مكان D:

يلا بيتين عالماشى ..

وصف الاجواء :-

الشبابيك بتخبط من الهوا ...

وفى صوت عواصف بره

الساعه 2 ونص بالليل .. السكون يسود المنطقه

بغض النظر عن كل ده وبعد ما سمعت فيروز وعملت المطلوب كله لأى ليله زى دى


كان نفسى دلوقتى فحاجه واحده

كان نفسى ادخل اتوضى واصلى واعد مع ربنا .. :(


حقيقى انا حزينه اكتر من هذا الليل الحزين .. عارفه انى فايتنى كتير اوى

فايتنى حياه حلوه اوى  جنب ربنا .. بقيت بتردد انى اكتب ادعيه او اتكلم فالدين عشان بحس انى منافقه

وبالرعم من علمى بأن ده الشيطان بيمنعنى من انى اعمل الحاجات دى بحجه انى مش انا الى اعمل كده وبتاع

زى ما بيقنعنا اننا بنقرب من ربنا بس وقت الحاجه وبرده بيقنعنا بأن مفيش امل مننا وكل ده

بس انا برده لسه حاسه انى منافقه

او متناقضه .. ازاى ادًعى انى بحب ربنا الحب ده وانا بعيده عنه اوى كده

ازاى احب الكلام عن ربنا واحس بقوه ايمانى وانا اصلا ضعيفه قدام الشهوات اوى كده

وازاى يكون فى حاجات اول ما بشوفها اقول اعوذ بالله واكيد لأ وفنفس الوقت بعمل حاجات تانيه محدش يصدق ان الى كانت بتقول كده هيا نفسها الى بتعمل كده

الى بدافع بيه عن نفسى انى صادقه فكلامى سواء استنكرت حاجه او عملت حاجه مبضحكش على نفسى بحاجه

وعارفه ان ربنا عارف كل ده :( ..

يا بختهم الى قريبين منك يارب

يابخت كل حد حاسس بحبك يارب .. يابخت كل حد ايمانه مقويه قدام كل شهوه او شيطان

يابخت الى دلوقتى قاعد قدام سجادة صلاه فى حضن ربنا ..على وشه دموع وبين ايديه مصحف وقدامه سبحه

الملايكه بتحوم حواليه وربنا باصصله ومبتسم

بس انا عارفه ان الوقت معداش والمسافه مهما طالت فهى قصيره وربنا عمره ما كان بعيد عن قلب عاوز يقربله

وربنا زى ما باصص للحد القوى الى قاعد بيصلى ..باصص عليا وبيقولى "كلا ان معى ربى سيهدين"

هيا الآيه دى لو مكنتش ليا هتكون لمين ؟؟

ربنا يرزقنا حبه وحب من احبه وحب كل عمل يقربنا لحبه :)