"انا مودى زفت انهارده"
كلمه بسمعها اكتر ما بسمع صباح الخير..وبسمعها من نفسى اصلا :(
ونعد بقا نقول اصل حصل كذا كذا كذا..وانهارده صحيت لقيت كذا
هقول لسيتك على حاجه رفيعه بس كده يعنى..<<سيتك اللى بتقرر مودك>>>
ماشى؟؟؟
يعنى متقولش انا مودى وحش...مودى مين؟؟؟
مفيش حاجه اسمها مودى وحش..ايه الى وحشه يعنى
بس ميغركش انى بقول كده..انا والله بيحصلى كده ياما جدا
بس بقا قومت قوفت كدهون وقولت لأاااااااااااااااااااا
وروحت اعدت تانى D: وقولت لازم اشوفلى حل فى الموضوع ده
وكمان انا موديه جدا..يعنى مودى بيأثر على كل حاجه
فبقا مش يومين تلاته اتقفل من موقف ولا خبر سمعته فحياتى كلها تبوظ احنا فاضيين؟؟؟
ازاى بقا تغير مودك يا معلم؟؟ انا هقولك
اولا متربطش مودك او مزاجك يعنى بحاجه معينه..يعنى فى ناس اما تدايق ممكن تاكل شوكلاته مثلا..اى نعم الشوكلاته اصلا من الاكلات الى بتحسن المزاج..بس مش هبقى متضايق ولما ملاقيش شوكلاته اتضايق اكتر وعلى ايه يعنى الهم ده :@
بس فى حاجات تانيه ممكن تغير مزاجك..مثلا العب رياضه
قوم اجرى بقا ارقص اتشقلط اعمل اى حاجه تفصلك عن المود الوحش
ثانيا شوف اى برنامج دينى او روحانى..لو بدأت يومك بانك تسمع حاجه دينيه او تنميه بشريه او حاجه فيها طاقه
هيأثر ايجابيا بطريقه احسن بكتير من الجرايد الى بيبقى فيها اخبار وحشه ياما وبنبدا بيها يومنا
ثالثا بقا ودى مهمه جدا على فكره
فى قاعده مهمه جدا وممكن تغير مودك فى وقت بسيط جدا
If you change how you move and use your body your mood will change
يعنى ايه بقا الكلام ده؟؟؟
انت عاوز مودك او مزاجك يبقى عامل ازاى؟؟ عاوز تبقى فرحان اتحرك واتصرف على انك فرحان
اول حاجه تعملها ابتسم :) خليك كده حوالى دقيقه :)
عاوز تبقى واثق فى نفسك مثلا
قوم وامشى ماشيه واثقه كده ارفع راسك وامشى كانك فى عرض ازياء ^^
واحسن طريقه لتغيير المود.انك تجمع ده كله
يعنى قوم وامشى ماشيه واثقه كده وابتسم افرد وشك كده وريلكس جدا كانك ستاار وبتتصور
متستهترش بالحاجات دى عشان دى بجد ليها تاثير
وديما افتكر انت الى بتقرر مودك
رابعا بقا :-
قدددر..اشكر كل حاجه حواليك..ونت متضايق اعد بص للحاجات الى حواليك كده واشكرها بجد اشكرها
يعنى لو هتكلم عن نفسى
-انا عايشه احسن عيشه الحمد لله
-شكرا يارب على اكلى
-شكرا على صحتى
-شكرا على كمبيوترى D:
-شكرا عل اهلى احسن اهل فى الدنيا
-شكرا على احلى اصحاب
-شكرا على المدونه :).المكان الى بقدر اكتب فيه كل حاجه
- شكرا على اللى بيقرا دلوقتى 
**الحاجه الحلوه اوى بقا فى موضوع الشكر ده
انك بمجرد ما بتحس بالشكر ناحيه حاجه معينه..بتلاقى نفسك عاوز تتنطط من كتر الفرحه
بص حواليك ..بص للاكل واحمد ربنا..بص لكل حاجه
وبعد كده انقل شكرك لبره..بص من الشباك على المنظر الى بره والناس الى ماشيه والى بتلعب واضحك :)
وديما اسال نفسك..ايه الى انسان ايجابى ومبسوط ممكن يعمله دلوقتى؟؟؟
واعمل كده وهتحس انك فرحان وايجابى
اعرف انك مش مشاعرك ومش احاسيسك..هما مش حد له سلطه عليك وانت لازم تستجيبلهم
انت الى ليك السلطه عليهم..
اعمل كده دلوقتى
--->معظم المعلومات متاخده من مواقع تانيه وانا كاتبها باسلوبى
ليست هناك تعليقات:
إرسال تعليق