احترم نفسك xD

حاجه غريبه اوى ازاى المواقف والعالم الخارجى بيأثر علينا وعلى مشاعرنا 

واحيانا قرارتنا

وازاى كل حاجه بنعد ناكدها لنفسنا ونقول اننا هنعملها مع اول مشكله واول اختبار بيبان كل الكلام سخيف وملوش قيمه

انا فى عززززز المواقف دى بقا xD

اول مره احس يعنى ايه مقاومه بينى وبين شيطانى 

انا بحاول ديما ..انى اأكد لنفسى حاجات عشان اجدد طاقتى يعنى وكده

ففى ايام كده اما ببتدى كويسه ..قبل ما انزل من بيتى بعد اقول انى هحاول اعمل كذا كذا كذا

ومش هخلى اى حاجه تقفلى يومى عشان مفيش وقت فى حياتى اضيعه فى تكشيره ومفيش حاجه تستاهل وكلام من ده كتير

بس ييجى فجاه موقف ..وتحس انك فى فيلم والدنيا ضلمت فجاه وبقت منوره عليك انت بس وانك بتواجه موقف وحش

ايا كان بقا الموقف..فى حالتى انا مثلا انى احس بالفشل وده بحس بيه بسرعه مع الاسف ..ان مثلا مدرس يفهم اى حاجه غلط ويزعقلى او يدينى كلمتين

فى اللحظه دى بسرعه بعد افتكر الكلام اللى لسه قايلاه لنفسى قبل ما انزل بس بلاقى صوت الصدمه او الاحباط بيقولى اسكتى

انتى بتضحكى على نفسك...بس لأنى الحمد لله ابتديت اعرف اتحكم فى نفسى.. بقول لنفسى فى اللحظه دى

لأااااااااااا :@ انا مش هكون الانسانه المحبطه اليائسه الى فى موقف او مشكله خلوها تخسر هدفها او حتى تضيع نص فرصه انها تحققه

وبعد معاندات وخناقات طويله بينى وبين الصوت الداخلى الى ديما بيقولى انتى مش مقدرلك انك تحققى هدفك انتى اصلا غبيه وفاشله

وعمرك ما هتكونى البنت الدحيحه الى جابت مجموع محدش عرف يجيبه

قلت لمنى( انا xD ) احترمى نفسك :@ :@

مش احترمى نفسك بمعناها التقليدى بس بالمعنى الحرفى للكلمه

متستهزئيش بنفسك والسبب انى ببساطه معرفش ربع الى ربنا اداهونى من نعم

ازاى اظلم نفسى واحكم عليها انها غبيه وانا معرفش ..وفجاه ديما بفتكر كل الحاجات الى تاكدلى انى غبيه

وانسى كل الحاجات الى بتاكدلى العكس 

طب انا احترم نفسى ازاى S:

ممممم انا اقولك...متعديش تستهزئى بنفسك وبقدراتك

ربنا مخلقكيش واداكى عقل واداكى كل الحاجات الى فيكى وانتى متعرفيش عنها حاجه عشان تعدى تتريقى فالاخر

احترم نفسى بانى اعترف انها تقدر..واسكت الصوت الى جوا ده بقا وبيعد يبعتلى رسايل سلبيه ديما

ويقولى مش هتقدرى ..مش هتعرفى :@ :@

هثبتله هو واى حد تانى انى اقدر ..ومقدرش ليه يعنى ؟؟ ناقصنى ايه 

الموضوع فى نظرى محتاج 3 حاجات

القرار....

الاراده.....

التوكل على الله....

لو جبت دول هعرف اعمل كل حاجه انا عاوزه اعملها...

دلوقتى بقيت اما اشوف اى حد بيتكلم عن نفسه وحش..ويقول معرفش مقدرش مش هقدر :@ :@

ببقى هموت واقوله احترم نفسك :@ :@

بس بخاف اتفهم غلط xD ..بس انا ببتنرفز كده..عشان انا بعانى من نفس الموضوع

فكأنى بقوله وبقول لنفسى ...من الاخر حبى لنفسى من حبى لربنا :)

لأن هو الى اداهانى وسابهالى وديعه ..احافظ عليها واطورها ديما وخليها احسن حاجه

""احترم نفسك...عشان هيا تستاهل انك تحترمها"

دييييييييمما..فكر نفسك بالحلو الى فيها..الى يخليها تقدر تحقق الى انت عاوزها تحققه

حاول ديما تصلح الوحش الى مش عاجبك فيها..بس متنساش تلتمس الاعذار لها اما تغلط..لو مكناش بنغلط كان ربنا بدلنا بناس بتغلط ويستغفروه فيغفرلهم :)

اامن ان جواك كنز انت لسه مكتشفتوش..ومهما اكتشفت صدق ان لسه موجود اكتر مستنيك تكتشفه

وده مش كلامى ربنا الى قال..بسم الله الرحمن الرحيم

   {وَإِن تَعُدُّواْ نِعْمَةَ اللّهِ لاَ تُحْصُوهَا إِنَّ اللّهَ لَغَفُورٌ رَّحِيمٌ }النحل18

--->ومتنساش النيه فكل حاجه بتعملها انك بتعملها عشان ربنا يرضى عنك بسسسس :)