الأربعاء، 11 يناير 2012

جنتى

الجنه...:-)
اول ما بتيجى فى بالك الكلمه دى.. بتفكر فى ايه؟؟


يعنى ايه مفهوم الجنه بالنسبالك؟؟.. طب عمرك فكرت شكل الجنه هيبقى ازاى


هتبقى انت عامل فيها ازاى؟ شكلك تصرفاتك..


مهما كانت تخيلاتك ومهما وصلت فكلنا عارفين ان الرسول عليه الصلاه والسلام قال
 "إن في الجنة ما لا عين رأت ولا أذن سمعت ولا خطر على قلب بشر" 


فاللى فى الجنه يفوق كل التخيلات وكل الى اى حد ممكن يحلم بيه...طيب ايه رايك لو الى انت بتتخيله ده تحققه فى الدنيا :)

يعنى تعيش جنتك الى انت قررت تصنعها..فتعيش احلى جنه تقدر تتخيلها فى الدنيا
ويستناك الجنه الى انت عمرك ما هتقدر تتخيلها 

ارسم صوره للجنه الى بتحلم بيها...ارسم صوره جنتك 
وكل يوم فكر نفسك بحالتك وانت عايش فى الجنه دى.. واشتغل اعمل كل الى تقدر تعمله عشان توصلها

يعنى مثلا تخيل انا فى الجنه هيكون شكلى كذا وعندى عربيه كذا بشتغل شغلانه كذا الى انا نفسى اشتغلها ..لبسى شكله عامل ازاى وهبقى اقرب لربنا اكيد يبقى هضيف لعباداتى كذا وكذا....وكل حاجه انت بتحلم بيها

تخيل حياتك صوت وصوره تخيل تصرفاتك عاداتك كل حاجه..بس متنساش ان الموضوع مش هيقتصر على تخيلات...مش هنعيش حياتنا كلها نتخيل

لازم نشتغل ونشتغل ونشتغل...أول الموضوع تبدا بحلم 

حلمك بأنك تبقى شخض معين عنده اهداف معينه
الحلم الى يصحى الرغبه الى جواك...الى تخليك تتحرك فى اتجاه محدد
دى اول خطوه..فى ناس بتقتصر على اول خطوه دى والخطوه دى بتبقى حياتها 
يعنى يعيشوا حياتهم يتخيلوا هما كان نفسهم فأيه والموضوع يخلص على كده..بيحسوا بمتعه حلوه اوى وهما بيتخيلوا الحاجات الى نفسهم فيها

بس مش بيشتغلوا بجد عشان يوصلولها..مش متخلين السعاده الى هيوصلولها اما يوصلوا لحلمهم
اذا كان مجرد التفكير فى الحلم وتخيلنا باننا مالكينه بيحسسنا بسعاده..اومال لو وصلناله بقا :o 
الحياه دى قرار..مش كلنا مستوعبين ده..بعضنا بيعيش وفاكر انه متقررله حياته هتبقى عامله ازاى
بيسميها تحت مبدا ان ده قدر مثلا

بس طيب مهو احنا الى بنصنع قدرنا.. 

قرر انت عايز تبقى مين..وتحمل مسئوليه قرارك.. :-)

--->متنسونيش بالدعاء D:

الاثنين، 9 يناير 2012

بشويه رغبه وعزيمه ..تعبنا هيبقاله قيمه

بقالى ياما اوى مكتبتش فى المدونه :-)

ولأنى بكتب ومش بهتم مين الى بيبص ;) 
انهارده عاوزه اتكلم عن العزيمه ... والاصرار

انا يمكن فأيام ببقى اقل واحده فى موضوع العزيمه ده... 
فى طريقه جديده جرتها وبجد نفعت...فالأيام الى انا مليانه فيها طاقه وحاسه بحب كده ونفسى اذاكر بجد واوصل لكل حاجه ومليانه طاقه ايجابيه... بكتب رسايل لنفسى.. بكتب كل حاجه حلوه انا حاسه بيها بكتب مخاوفى..والحاجات الى مطمنانى

بحتفظ بالحاجات دى...وفى الايام الى انا حاسه فيها بيأس وانى مش هنجح والكلام الفاضى الى الشيطان بيساعدنى عليه ده
بقرا الرسايل دى... وبكتب برده اللى انا حاسه بيه.. بس مش بحتفظ بيه من ناحيه ابقى طلعت كل المشاعر الى جوايا ومن ناحسه تانيه ابقى كأنى اتخلصت من المشاعر دى.... ساعات ببقى حاسه بيأس اوى لدرجه انى لما اقرا الرسايل الايجابيه دى الى انا كاتباها بأيدى
اقول ياااااااه كنت هبله اوى =)) 
اهو ساعتها بقااااااا ببقى محتاجه الرغبه والعزيمه... وانى اقوى على نفسى ومستناش اى حد تانى يقوينى 

وعلى فكره فى الايام الضلمه دى الى بنبقى حاسين فيها اننا كنا هبل وبنحلم احلام مش من حقنا.. عقلنا بيركز ديما على الحاجات الى بتدعم فكرنا.. يعنى لما بنفكر فى النجاح عقلنا بيسترجع كل حاجه عن النجاح.. وبرده اما بنفكر فى الفشل واننا فاشلين عقلنا بيدعم الفكره دى...ومن ناحيه الحاجات الى  تحسسنا بالفشل فهما ميتعدوش.. بس ديما بيبقى فى حاجه جواانا بتقولنا لأأأ احنا نقدر
اهو فى الايام دى بقا وفى اللحظات الرخمه دى احنا لازم ندور على الحاجه دى... على الجزا الى فينا الى بيقولنا احنا متخلقناش عشان 
نبقى فاشلين ويائسين ومليانين طاقه سلبيه 

الموضوع مش محتاج اكتر من رغبه وعزيمه وشويه اراده يخلونا نقدر على نفسنا ونقوى على الاحباطات الى حوالينا 

"ومن يتهيب صعود الجبال يعش ابد الدهر بين الحفر"