دنيتى اتغيرت3>

مممممممممم
كتير اوى بالنسبالهم البنت اللى عندها 15 سنه دى
لسه مدخلتش دنيا..بس انا بقا يتهيالى انى عشت اللى يخلينى اعرف كويس اوى
الفرق بين الحياه بعيد عنه...والحياه فى قربه D:
مين بقا اللى انا بتكلم عنه؟؟
انا بتكلم عن حبيبى...عن اللى ادانى الحياه
عن اللى عرفنى كل حاجه انا كنت محتاجه اعرفها
حبيبى هو الوحيد الى بيفهمنى صح اوى
....
وكل ما اعوذ حاجه بيجبلى احسن منها..وكمان من غير ما اقوله يديهانى
قبل كده..كنت على طول شويه يمين وشويه شمال
مكنتش عارفالى اتجاه
شويه امشى ورا كلام الناس...وشويه ابقى كرهاهم
مكنتش قادره ....
ابقى ---->انا<----
برده يعنى ايه ابقى انا؟؟؟
يعنى مكنتش بسمع كلام نفسى
مكنتش مصدقه انى عندى عقل...يعنى كنت مصدقه الناس انى بجد مشوفتش دنيا وانى لسه عيله والكلام اللى لا بيودى ولا بيجيب ده!!!
-على فكره انا عارفه انى لسه صغيره...وانى لسه بدرى عليا اوى اوى عشان اعرف احكم على الدنيا وكده
بس ده ميعارضش انى برده اقدر اقرر انا عاوزه ايه
وميعارضش انى احاول يكون ليا دور فى الحياه
ايه علاقه سنى بانى عاوزه يكون ليا دور فى الحياه؟؟؟
وليه لازم اول ما اقول لحد انا نفسى يكون ليا بصمتى فى العالم اول حاجه بتيجى فى ذهنه هو انا سنى كام؟؟؟؟
انا مقولتش انى اعمل البصمه دى بكره الصبح
بس برضه لازم على الاقل ااهل نفسى لانى اكون انسان يذكر بالخير فى الدنيا دى
كـــــــــــــــــــــــــــــــل ده بقا..كان بيدور فى دماغى قبل ما اوجه قلبى لحبيبى
حسيت فجاه ان كل ده بيحصلى عشان فى حد عاوزنى اعيد تفكير فى حياتى
فى حد بيقولى انتى مش موجوده فى الدنيا دى زيك زى غيرك....
لازم تعملى حاجه...تغيير
خليكى ايجابيه
اول حاجه عملتها بعد كل الاحاسيس دى ايييييييييه بقا؟؟؟
دخلت نمت :))
ههههههههههههه حته رخامه فى النص بس D:
اول حاجه عملتها بعد ما ادركت انى مش موجوده فى الدنيا دى عشان اعيش عادى
انى قررت
خدت القرار انى استجيب...وسبحان الله
اول ما خدت القرار..والله ماعداش اليوم الا اما لقيت الظروف كلها بتساعدنى
كنت انا اخد الخطوه الاقى على طول الاستجابه بتسبق خطوتى
اتعرفت على ناس غيروا فى عينيا حاجات كتير
ابتديت اسمع عن حاجات جديده عمرى ما سمعت عنها
حاجات حسستنى انى ممكن واقدر اغير العالم ده بجد
ودلوقتى بعد ما حسيت اد ايه انا دنيتى اتغيرت
مقدرش اعمل حاجه ..غير انى اقف عاجزه عن شكر حبيبى
بجد بجد انا بحبك اوى يارب
رغم ان فى حاجات كتير فى حياتى لسه مش مظبوطه
الا ان فى حاجات اساسيه فى دنيتى بقت احسن..وكل ده قربى منك غير دنيتى

انا بقدم قلبى اه لو تقبله..وادى كمان عمرى كانه فى اوله
الشوق ده كله قولى مين يتحمله.يكون فى عونك يلى زيى مجربه
<اها دى اغنيه عمرو دياب بس هيا الا حد كبير بتوصف احساسى من ربنا>

شكرا يارب على كل حاجه...

نفسك فى ايه غير كمننا ((:

*كلنا فى الدنيا دى بندور على السعاده
وفى الدنيا بنعد نفكر فى الوسائل
مع ان المفروض اما نيجى نحط لنفسنا هدف...نركز على الهدف مش على الوسيله
والا هتبقى الوسيله هدف
نفسك فى ايه بقاااااا؟؟؟
يتهيالى حاجه ممتعه جدا اننا نفكر فى الكون او الدنيا دى..على انها MENU>
يعنى ايه بعنى؟؟؟
يعنى نبص على الدنيا كده ونقول انا نفسى اعمل كذا وكذا وكذا
واخدها وحده وحده واعد اجرى ورا الهذف لحد ما اجيبه
واما اوصله اشوف اللى بعده وهكذا...كده هنحس بجد اننا عايشين حياتنا صح
ونستفيد بكل لحظه فى حياتنا
بالنوسبالى انا بقا D: 
انا دلوقتى لسه عندى امتحانات اخر السنه كمان اسبوعين ان شاء الله
بس انا مش بفكر فى الامتحانات..مع ان المفروض افكر
بس اكتر حاجه شغله بالى..انا ايه اللى هعمله بعد الامتحانات
يعنى الاجازه
ايــــــــــــــــــــــه بقا؟؟
مجرد التفكير فى انى عندى شهرين وشويه ملكى لوحدى بتخلينى مش عارفه اختار
لان لسبب ما احنا بنحط ايام الدراسه دى كانها مش تبع حياتنا
بس كمان لان السنه الجايه ان شاء الله هتبقى تانيه ثانوى
وبالنسبالى تانيه ثانوى دى اول سنه فى حياتى بجد
المهم برضه..انا بقا نفسى فى ايه؟
محمد هنيدى كان نفسه فى كمننا
انا نفسى فى الاجازه انى باذن الله..اخد قورصات السنيــــــــــــــن
يعنى اخد كورس فرينش..احضر ندوات
ولازم لازم لازم اشارك فى عمل خيرى او جمعيه
وباذن الله هحفظ قراان 
نفسى لما ادخل تانيه ثانوى اكون :-
1_حافظه مالا يقل عن جزاين كمان من القراان
2_اكون شاركت فى عمل خيرى
3_اكون خدت قورص فرنساوى وخلصته
4_اكون قريبه من ربنا اوى اوى اوى
من الاخر نفسى ادخل تانيه ثانوى..وانا راضيه عن نفسى كبنت مسلمه عندها 16 سنه
باذن الله عاوزه اكون البنت اللى انا نفسى اكون هيا
وقبل ده كله نفسى انى اعدى اولى ثانوى الاول ان شاء الله
بس يا ترى لما تيجى ان شاء الله تانيه ثانوى هكون كده فعلا
عشان انا باذن الله تانيه ثانوى هدخل كيميا
وناويه بعوووووون الله اطلع الاولى على الجمهوريه
رغم كل الناس اللى اول ما بقولهم كده بيضحكوا<احم واثقين فى قدراتى اوى > بس انا باذن الله بجد حاسه انى هبقى حاجه
ومش هيتاكد الاحساس ده بالنسبالى غير لما احقق الهدف ده
يااااااااااااارب احققه :((

 
 ايوووووووووووووون انا لا حدود لى D:


                                                       
اللهم من اعتز بك فلن يذل،
ومن اهتدى بك فلن يضل،
ومن استكثر بك فلن يقل،
ومن استقوى بك فلن يضعف،
ومن استغنى بك فلن يفتقر،
ومن استنصر بك فلن يخذل،
ومن استعان بك فلن يغلب،
ومن توكل عليك فلن يخيب،
ومن جعلك ملاذه فلن يضيع،
ومن اعتصم بك فقد هدى إلى صراط مستقيم،
اللهم فكن لنا وليا ونصيرا، وكن لنا معينا ومجيرا، إنك كنت بنا بصيرا
 
 

ممكلتى انا D:

ممكلتى انا....مش قصدى على اغنيه فيروز D:
انا بتكلم على حياتى ...
وفى رايى المفروض كل انسان وبالذات يعنى البنات
يعتبروا حياتهم الممكله الخاصه بيهم...وتحط عليها حراس كتير
مش اى حد يدخل المملكه دى...ولا اى حد يقابل البرينسس اللى عايشه فيها
      .............
كنت فاكره زمان ان البنت دى زى ما كل الناس بيقولوا وزى ما اهالينا كانوا بيقولولنا وهما بيكلمونا عن الحجاب
ان البنت دى جوهره
يعنى ايه بقا البنت جوهره؟؟؟

يعنى البنت <مش اى بنت> اللى بتعتبر نفسها جوهره
مش هتقبل ان اى حد يشوف جسمها
المفروض البنت تغير على مفاتنها...لما بشوف اى بنت ماشيه فى الشارع بتقول للناس بصوا عليا
ببقى عاوزه اسالها سؤال واحد بس"هو اللى انتى مبيناه ده مش جسمك؟؟"
ولو انتى شايفاه جسمك ليه بتخلى اى حد كده يشوفه؟؟؟
ربنا خلق البنات هما سكر الحياه اللى بيديها طعم
ولرغم كل المنافسات بين الجنسين..الا ان الرجاله عمرهم ما يقدروا يعيشوا من غير ست تدعمهم
نرجع للجوهره بقا...
بيتهيالى احساس ممتع اوى انك تحسى انك برينسس
واللى انا بقوله ده مش غرور ..ده مجرد كبرياء
وفى فرق كبير اوى ما بين الكبرياء والتكبر
<عارفه انى ابتديت الغبط فى الكلام>
بس والله الكلام ده بجد
الكبرياء ده الخصله اللى المفروض تكون فى اى بنى ادم...عكس الذله والمهانه
انما التكبر ده صفه ربنا يكفينا شرها...وده عكس التواضع
يعنى الانسان المفروض يبقى عنده كبرياء وفى نفس الوقت متواضع
تانى برده نرجع للجوهره...اللى عندها كبرياء
كبرياء عن الرذائل اللى بتحيط بينا كل يوم وفى كل مكان!!!
تحفظ نفسها ..تحفظ الجوهره .الجوهره دى مش اى حد هيحصل عليها
لو بجد كل بنت قدرت تحس المعنى ده...مش هنلاقى العلاقات الهبله<سورى فى اللفظ> اللى بنلاقيها دلوقتى
يعنى ايه تبقى فى علاقه مع شاب ونتو مش مخطوبين ؟؟؟
الجوهره..الى بيعوزها وبيحبها بجد لازم يدفع التمن
لازم يروح يدفع تمن انه يتقال عليه خطيبها
اصلى مش هخرج مع واحد ونعد نلف مع بعض لمجرد انى معجبه بيه
بيتهيالى احسن كتير..انى ابقى معجبه بيه واغض بصرى وادعى ربنا انه يكتبه من نصيبى
فى مملكتى بقا الوضع مختلف....انا مش بسمح لنفسى انى اعجب بشاب
بمعنى اصح فى رايى لما بعجب بشاب واحبه...حبى ليه ده بيقلل من حب ربنا فى قلبى
لانه مش مبنى على اى حاجه..وعشان كده ناويه باذن الله
<فى المستقبل يعنى ان شاء الله> لما اعجب بشاب هحكى لربنا عليه
ومش هعمل اكتر من انى ادعى انه لو فيه خير ليا يكون من نصيبى
اصلى قررت ابقى بجد جوهره..وبرينسس..احفظ نفسى فى مملكتى <3
ومش اى حد يقدر يعدى الاسوار ويوصلى

 
  ONLY ALLAH OWNS MY HEART <3<3

ربنا معاك :)

<ربنا معاك> كلمه بتتقال كتييييير قوى

بس عمرك حستها قبل كده؟؟؟

انى ابقى مع ربنا ...ياااااااااااااااااااااااه دى حاجه كبيـــــــــــــــــــــــــــــــــــــــره اوى

كبيره لدرجه انك لو حسيتها بجد هتحس ان مفيش حاجه فى الدنيا دى صعبه عليك

ده انت معاك اللى خالق الدنيا دى اصلا

عمرك مثلا كنت اعد مع اصحابك بتضحكوا وبتلعبوا مع بعض

وفجاه بصيت للاعده دى من بره...يعنى بصيت على نفسك ونت اعد مع اصحابك بتضحك

ولقيت نفسك من غير ما تتكلم بتحمد ربنا من جوه ااااااااااوى

بتقله انا بحمدك يارب...بجد بقولها من قلبى

طب عمرك مثلا كنت ماشى لوحدك فى الشارع وفجاه ابتسمت كده لانك لقيت نفسك فجاه مش حاسس بوحده...انت معاك ربنا...قومت بدل ما تمشى جرى عشان تروح مشوارك ومتمشيش لوحدك

لا ده انت مشيت وحده وحده ونت بتسبح ربنا...بتسبح ربنا فى كل خطوه

كانك بتنور الطريق.:)

ربنا حاط كل واحد فى الدنيا دى...وخلى كللللللللللل حاجه ملك له

عارف يعنى ايه ان الدنيا دى تبقى ملكك؟؟؟

انت حاسس بالكلمه الدنيا دى ملكى

انا ربنا خلقنى وقلى انى خليفته فى الارض..وقلى انت كل حاجه ملكك

استخدمها صح..عيش صح

اتعلم واقرا واثقف...ابنى..واضحك واخرج واستمتع بحياتك"ولا تنسى نصيبك من الدنيا"

استثمر حياتك بكل الطرق...متعديش يوم غير اما تضيف حاجه لكتاب حياتك

"اللهم إنا نبرأ من الثقة إلا بك، ومن التوكل إلا عليك، ومن اللجوء إلا إليك، ومن الخوف إلا منك، ومن الرضا إلا عنك، ومن الطمع إلا في جنتك، ومن الانحناء إلا لجلالك العظيم، ومن الوقوف إلا على بابك".

يارب زى ما جمعتنا فى الدنيا على ذكركجمعنا فى الاخره فى جنتك <3<3

اللهم تقبل :) :)

البدايه :)

بسم الله السحمن الرحيم
هااحم...ده اول موضوع ليا فى المدونه فحبيت اسمَى الاول
اول حاجه احب اعرفكم بنفسى..
انا اسمى..منى مصطفى
عمرى..15 سنه وكلها كام شهر واكمل الستاشر
بس مش ده المهم لا اسمى ولا سنى
المدونه دى عشان اقدم افكارى
افكارى عن كل حاجه بتحصل فى الحياه
لحد اسبوع فات تقريبا
كانت حياتى بالنسبالى مجرد حياه...يعنى حياه عاديه جدا مفيهاش الا دروس واصحاب
ومدرسه وكلام فاضى من ده
وطبعا لا هدف بقا فى الحياه...ولا تفكير فى المستقبل ولا كلام من ده
مهو انا زى ما كتير بيقولوا <لسه صغيره>
بس السؤال بقا..هو انا بجد صغيره؟؟؟
يعنى هو انا المفروض يبقى عندى كام سنه عشان ابقى كبيره؟؟ طب ولما ابقى كبيره المفروض اعمل ايه؟؟؟
-ممممم تبقى كبيره لما تبقى عندك مثلا 24 سنه ولا حتى 23 طب يا ستى ادخلى كليه الاول
-ههههههههه طب ودى تفرق فى ايه يعنى؟؟؟
الفكره مش انا عشت كام سنه فى الحياه دى...الفكره انا بفكر فى ايه
ممكن واحده يكون عندها 40 سنه ومفيش فى دماغها حاجه غير انها تعيش الدنيا دى جنب الحيط
وانا بقا عندى 15 سنه بس جوايا افكار تخلينى باذن الله اغير العالم ده
انا صحيح معنديش الخبره ولا الثقافه اللى تاهلنى لده دلوقتى
ماشى انا معاك..بس جوايا احساس قوى انى اقدر
وجه فضل ربنا عليا...يوم ما حسيت بقيمه حياتى...ازاى اكون فى احسن فترات عمرى ومستفدش بيها...ازاى استنى سن معين لمجرد ان الناس مش بتحترم اللى اقل من السن ده او بيبصوله على انه<لسه مطلعش من البيضه>..اشعرفنى اصلا انى هوصله
ولو موصلتلوش وحياتى انتهت مثلا...هقابل ربنا اقوله ايه؟؟؟
وانا عارفه كويس انى كنت ممكن استفاد من حياتى اكتر من كده بكتيييييير
عشان كده...انا هاهل نفس بعون الله ثم بارادتى..انى احط لمستى على الكون ده :)
واحفر اسمى فى العالم وابقى مسلمه بجد وبمعنى الكلمه..انا يمكن لسه محددتش بالظبط انا ايه هدفى...بس كل اللى انا اعرفه ومحدداه انى مش هبقى عاديه
مش هعيش واموت ويبقى الكون محسش بيا..ربنا حط كل واحد فينا على الارض دى وفى المكان ده وفى الزمان ده لسبب ما..ولحد ما اعرف ايه السبب ده..لازم ااهل نفسى بككككككل الطرق
اقرا واثقف..اعيش حياتى صح..اعرف كل الناس واتعلم من الوحش قبل الكويس
استفاد من كل دقيقه من عمرى هتروح ومش هتييجى تانى..
الحمد لله ليك يارب انك عرفتنى المعنى ده ...وكمان بعتلى وحده من الملايكه اللى عايشين مع البشر..اللى هيا وحده من الناس القليله اللى فى الحياه دى اللى بيعرفوا ياخدوا الناس للطريق الصح
<استاذه هبه سامى> بجد شكرا :) :)